JUN 09 EVENING

யோவான் 5:39

வேதவாக்கியங்களை ஆராய்ந்துபாருங்கள்; அவைகளால் உங்களுக்கு நித்தியஜீவன் உண்டென்று எண்ணுகிறீர்களே, என்னைக்குறித்துச் சாட்சிகொடுக்கிறவைகளும் அவைகளே.

யோவான் 5:39

வேதவாக்கியங்களை ஆராய்ந்துபாருங்கள்; அவைகளால் உங்களுக்கு நித்தியஜீவன் உண்டென்று எண்ணுகிறீர்களே, என்னைக்குறித்துச் சாட்சிகொடுக்கிறவைகளும் அவைகளே.
Kirubai Sathiyam logo
கிருபை சத்தியம்
Your browser does not support audio playback. Download the file here.

"வேதவாக்கியங்களை ஆராய்ந்துபாருங்கள்" (). இங்கு ஆராய்தல் என்று மொழிபெயர்க்கப்பட்டுள்ள கிரேக்க வார்த்தை, மனிதர்கள் பொன்னைத் தேடும்போதோ, அல்லது வேட்டைக்காரர்கள் மிருகங்களைத் தீவிரமாய்ப் பின்தொடரும்போதோ செய்யும் துல்லியமான, நெருங்கிய, ஜாக்கிரதையுள்ள, ஆர்வமான தேடுதலைக் குறிக்கிறது. ஒன்று அல்லது இரண்டு அதிகாரங்களை மேலோட்டமாய் வாசிப்பதோடு நாம் திருப்தியடைந்து ஓய்ந்திருக்கக் கூடாது, மாறாக ஆவியின் விளக்கை ஏந்திக்கொண்டு, வார்த்தையின் மறைவான பொருளை நாம் திட்டவட்டமாய்த் தேட வேண்டும். பரிசுத்த வேதாகமம் ஆராயப்படுவதைக் கேட்கிறது—அதன் பெரும் பகுதியை ஜாக்கிரதையுள்ள படிப்பின் மூலமாக மாத்திரமே கற்றுக்கொள்ள முடியும். குழந்தைகளுக்குரிய பாலும் உண்டு, பலமுள்ள மனிதர்களுக்குரிய பலமான ஆகாரமும் உண்டு. வேதத்தின் ஒவ்வொரு வார்த்தையின் மேலும், ஆமாம், ஒவ்வொரு எழுத்தின் மேலும் பொருள்களின் மலையே தொங்குகிறது என்று ரபீக்கள் ஞானமாய்க் கூறுகிறார்கள். தெர்துல்லியன், "வேதவாக்கியங்களின் பரிபூரணத்தை நான் ஆராதிக்கிறேன்" என்று கூவுகிறார். தேவனுடைய புஸ்தகத்தை வெறுமனே மேய்ந்து செல்பவன் எவனும் அதினால் பிரயோஜனம் அடைய முடியாது; மறைந்திருக்கும் பொக்கிஷத்தைப் பெறும் வரை நாம் தோண்டிக் கொண்டே இருக்க வேண்டும். ஜாக்கிரதை என்னும் திறவுகோலுக்கு மாத்திரமே வார்த்தையின் கதவு திறக்கிறது. வேதவாக்கியங்கள் ஆராயப்பட வேண்டிய உரிமையைக் கொண்டிருக்கின்றன. அவைகள் தேவனுடைய எழுத்துக்கள், தெய்வீக முத்திரையையும் அங்கீகாரத்தையும் சுமந்து நிற்கின்றன—அவைகளை அலட்சியமாய் நடத்தத் துணியும் மனிதன் யார்? அவைகளை அசட்டை செய்கிறவன் அவைகளை எழுதின தேவனை அசட்டை செய்கிறான். மகா பெரிய நியாயத்தீர்ப்பு நாளில் நமக்கு விரோதமாய் சாட்சி பகரும் வேகமான சாட்சிகளாக நம்முடைய வேதபுஸ்தகங்கள் மாறுவதற்கு நாம் அவைகளை அலட்சியமாய் விட்டுவிடாதபடி தேவன் தடுப்பாராக. தேவனுடைய வார்த்தை ஆராய்வதற்குரிய பலனைத் தரும். அங்கொரு தானியமும் இங்கொரு தானியமுமாய் இருக்கும் பதர் மலையைச் சலித்துப் பார்க்கும்படி தேவன் நமக்குக் கட்டளையிடவில்லை, மாறாக வேதாகமம் என்பது புடைக்கப்பட்ட தானியமாகும்—நாம் களஞ்சியத்தின் கதவைத் திறந்து அதை அள்ளிக் கொள்ள வேண்டியதுதான். வேதம் படிக்கும் மாணவனுக்கு அது வளர்ந்து கொண்டே இருக்கும். அது ஆச்சரியங்கள் நிறைந்தது. பரிசுத்த ஆவியானவரின் போதனையின் கீழ், ஆராய்கிற கண்ணுக்கு அது வெளிப்பாட்டின் பிரகாசத்தோடு ஒளிர்கிறது, அது செதுக்கப்பட்ட பொன்னால் வேயப்பட்ட ஒரு மாபெரும் ஆலயத்தைப் போலவும், பத்மராகம், மரகதம் மற்றும் சகலவிதமான நவரத்தினங்களால் கூரை வேயப்பட்டதாகவும் இருக்கிறது. வேத சத்தியத்தின் வியாபாரத்திற்கு நிகரான வியாபாரம் வேறு எதுவும் இல்லை. இறுதியாக, வேதவாக்கியங்கள் இயேசுவை வெளிப்படுத்துகின்றன: "என்னைக் குறித்துச் சாட்சி கொடுக்கிறவைகளும் அவைகளே." வேதாகமத்தை வாசிப்பவர்களுக்கு இதைவிட பலத்த நோக்கம் வேறு எதுவும் வற்புறுத்தப்பட முடியாது: இயேசுவைக் கண்டடைகிறவன் ஜீவனையும், பரலோகத்தையும், எல்லாவற்றையும் கண்டடைகிறான். தன் வேதபுஸ்தகத்தை ஆராய்ந்து தன் இரட்சகரைக் கண்டடைகிறவன் பாக்கியவான்.

சார்ல்ஸ் ஸ்பர்ஜனின் காலை மற்றும் மாலை தியானங்கள்.